Рускиот претседател Владимир Путин ја повика владата да ги зголеми пензиите, социјалните бенефиции и платите на државните службеници со цел да се ограничат економските последици од војната во Украина. Износите треба да се прилагодат на стапката на инфлација, која во моментов е 17,5 отсто, рече Путин на владината седница одржана преку видеоврска.
Путин ѝ нареди на владата да внесе свежи пари во економијата за да се зголеми потрошувачката.
„Сега е исклучително важно да се поддржи домашната побарувачка, да се спречи прекумерното намалување“, рече тој.
По руската инвазија на Украина на 24 февруари, западните земји воведоа невидени економски санкции кон Москва. Според проценките на Светска банка, рускиот БДП годинава ќе се намали за 11,2 отсто, што е најмногу од 1994 година.
Економските експерти сметаат дека невработеноста и инфлацијата значително ќе се зголемат во 2022 година. Стапката на инфлација би можело да достигне околу 20 отсто.
