Рускиот претседател Владимир Путин беше гостин на телевизија и им се обрати на Русите кои не ја поддржуваат инвазијата.
Тој рече дека Русите „секогаш ќе можат да ги разликуваат вистинските патриоти од никаквеците и предавниците и дека таквите едноставно ќе ги исплукаат како комарец кој случајно им влетал во уста“, пишува Sky News.
Тој го обвини Западот дека ја користи таканаречената петта колона руски предавници за да создаде граѓански немири.
„Има само една цел, јас веќе зборував за тоа - уништување на Русија. Убеден сум дека таквото природно и неопходно самопрочистување на општеството само ќе ја зајакне нашата земја“, рече Путин.
Не ги осудувам оние кои имаат вила во Мајами, вели Путин
Тој се осврна и на руските олигарси кои живеат на Запад.
„Воопшто не ги осудувам оние кои имаат вила во Мајами или на Француската Ривиера, кои не можат без паштета од гускин дроб, остриги или таканаречените родови слободи. Проблемот апсолутно не е тоа, туку, повторувам, фактот дека многу од овие луѓе се ментално лоцирани токму таму, не овде, не меѓу нашите луѓе, не во Русија“, рече Путин.
„Тоа е она што тие го мислат - знак на припадност кон повисока елита, повисока раса“, додаде тој.
