Пандемијата и работата од дома им покажаа на вработените поинаков начин на работа, а резултатот беше зголемување на нивните очекувања затоа што открија дека можат да работат надвор од канцеларија, подалеку од колегите и шефовите. Дополнително, на мнозинството им беше дадена можност за флексибилно работно време.
Затоа воопшто не е чудно што голем број луѓе сè уште не се подготвени да се вратат на старите начини, туку уште претпочитаат да работат од дома. Огромното мнозинство од нив се дури и подготвени да ја напуштат својата работа само за да избегнат да се вратат во канцеларија.
Според најновото истражување, 61 процент од милениумците се подготвени да ја напуштат својата работа доколку мораат повторно да работат во канцеларија пет дена во неделата. Полно работно време во канцеларија се чини дека е дел од минатото, бидејќи истражувањето Employment Hero потврди дека поголемиот дел од вработените луѓе на возраст од 18 до 44 години претпочитаат да работат од далечина.
Дури 88 отсто од испитаниците рекле дека работат од дома барем еднаш неделно, а на прашањето која е главната причина за останување дома, 22 отсто од нив одговориле дека тоа ја зголемува продуктивноста, додека 20 отсто одговориле дека работата на далечина го подобрува квалитетот на работата.
Вработените повеќе се посветуваат на своите семејства
Ден, новопечен татко, изјави за News.com дека работата од дома му овозможила да поминува повеќе време со своето семејство, што стана уште поголем приоритет за време на пандемијата.
„За работа ми треба само лаптоп, телефон и брз интернет. Нема потрошено време за патување до канцеларија, залудно потрошено време на состаноци или секојдневни разговори. Со оглед на тоа што во меѓувреме станав татко, заштеденото време можам да го искористам за зацврстување на врската со сопругата и детето“, објасни тој.
Во споменатото истражување учествуваа и работодавците, кои беа прашани зошто и по карантинот продолжуваат да поттикнуваат работа од дома. 34 отсто рекле дека ја подобрува благосостојбата на вработените. Нешто повеќе од 30 отсто од работодавците рекле дека тоа го подобрува задоволството на вработените, 23 отсто рекле дека тоа се должи на барањата на голем број вработени, додека 22 отсто рекле дека тоа се должи на зголемената продуктивност.