Елафонисос е мал остров во Грција кој се наоѓа во близина на Пелопонез, а поради својата убавина го нарекуваат „грчки Малдиви“.
Некогаш на овој остров слободно трчаа кози и престојуваа искусни кампери, а денес многу луѓе сакаат да го посетат овој рајски остров кој се простира на 19 квадратни километри.
Елафонисос лежи во заливот помеѓу Пелопонез и островот Китира, и е познат по плажите со ситен бел песок и кристално чиста, смарагдна вода.
Островот Елафонисос е на нешто повеќе од 1.030 километри од Скопје, а од местото Поунт треба да се качите на траект кој ќе ве однесе до островот. Иако маѓепсува со својата убавина, островот е малку познат на туристите од Македонија и речиси никогаш не може да се најде во понудата на нашите агенции.
Во сезона, островот го посетуваат до 3.000 луѓе, а на главната улица има различни ресторани и таверни во кои можете да уживате во традиционалната грчка храна, како и риба и морски плодови.
Додека престојувате на овој мал остров, по мост можете да стигнете и да го посетите средновековниот град и тврдина Монемвасија, која се наоѓа на голема карпа. На самиот влез на островот ќе ја видите црквата од 19 век, Агиос Спиридона. До црквата може да се види споменик на срната по кој островот го добил името, а покрај црквата срните се сметаат за заштитници на ова место.
Најпознати плажи се Саракинико, Фрагос (Симос) и Панагиас Нисија. Долги се, песочни и пространи, па дури и во екот на сезоната можете да најдете место за вас. Она што секако остава впечаток е чистото тиркизно море во кое со големо задоволство ќе пливате. Многумина кои го посетуваат овој скриен рајски остров одлучуваат дека тоа е нивната оаза на релаксација секоја година.
