Пребројувањето на гласовите од неделните парламентарни избори во Албанија е при крај, а лидерот на Социјалистичката партија, Еди Рама, преку објава на Facebook веќе прогласи победа со „досега освоени 74 пратенички мандати“.
Тој за попладнево најави прослава на плоштадот „Скендербег“ во Тирана, ги повика сите на, како што ја нарече, „прегратка на победата“ и постираше фотографија на која е со широка насмевка.
– Денеска во 18 часот на плоштадот „Скендербег“, шампионскиот тим на покровители, координатори, раководители, пратеници и кој сака да ни се придружи за да ја прегрнеме победата. ПС12 Победа Шампиони, пишува Рама.
Sot në 18.00, në Sheshin Skënderbej, skuadra kampione e patronazhistëve, koordinatorëve, drejtuesve, deputetëve dhe kush të dojë të na bashkohet për përqafimin e fitores❤️ #PS12🌹#Fitore💪 #Kampionë
Posted by Edi Rama on Tuesday, April 27, 2021
Десничарската коалиција „ПД-Алијанса за промени“, предводена од демократите на Љуљзим Баша има 59 мандати, што е 18 пратеници повеќе од минатите избори.
Најголемо разочарување е Движењето за социјалистичка интеграција на Моника Круемади – четири пратенички места, која на минатите избори имаше 20 мандати, додека најголемо изненадување е Социјалдемократската партија на Том Доши, која има три пратенички мандати.
Во Изборната единица на округот Корча каде што во трка за пратенички мандати беа лидерот на Македонска алијанса за европска интеграција, Васил Стерјовски, Социјалистичката партија, на чија листа беше тој, освои шест пратенички мандати. Вториот Македононец, Панди Јани, беше на листата на ЛСИ, која во оваа изборна едница остана без пратеници.
Инаку, Централната изборна комисија најави дека официјалните резултати може да се очекуваат доцна попладнево.
