На Волстрит цените на акциите вчера благо пораснаа додека инвеститорите ги очекуваат новите квартални деловни извештаи од компаниите и економските вести кои би можеле да укажат дали американската централна банка треба да продолжи да ги зголемува каматните стапки.
Dow Jones зајакна 0,30 отсто, на 33.987 поени, додека S&P 500 порасна за 0,33 отсто, на 4.151 поен, а индексот Nasdaq 0,28 отсто, на 12.157 поени. Во исто време, цените на акциите најмногу пораснаа во финансискиот сектор, во просек 1,1 отсто, а најмногу паднале во енергетскиот сектор, 1,3 отсто.
Финансискиот сектор е во ритам од петокот, кога големите три банки - Citigroup, JPMorgan Chase и Wells Fargo - ги објавија своите квартални деловни извештаи, а сите тие дадоа подобри резултати од очекуваните. Како резултат на тоа, загриженоста на инвеститорите за состојбата во секторот стивна по колапсот на неколку регионални банки во март.
Оваа недела резултатите ќе ги објават голем број големи банки и компании, меѓу кои Bank of America, Goldman Sachs, Tesla, Johnson & Johnson, Netflix... Но, очекувањата не се многу светли. Според најновите проценки на аналитичарите во истражувањето на Reuters, заработката на компаниите од индексот S&P 500 ќе биде за 4,8 отсто помала во првиот квартал отколку во истиот квартал минатата година.
Инфлациските притисоци во САД се намалуваат, но други економски показатели сугерираат дека ФЕД може да продолжи да ја затегнува монетарната политика. На пазарот на пари, се проценува дека има околу 80 отсто шанси ФЕД да ги зголеми каматните стапки во мај за дополнителни 0,25 процентни поени, во опсег од 5 до 5,25 отсто.
Внимателно вчера се тргуваше и на европските берзи. Лондонски FTSE индекс зајакна за 0,10 отсто, на 7.879 поени, додека франкфуртски DAX се лизна за 0,11 отсто, на 15.789 поени, а париски CAC 0,28 отсто, на 7.498 поени.
