Зголемениот раст на продажба на книгата на Нострадамус во Британија откако тој ја „предвиде“ годината на смрт на кралицата Елизабета II е доказ дека сѐ уште има луѓе кои веруваат во пророци.
Имено, многумина тврдат дека тој пред повеќе од 450 години „знаел“ кога ќе умре британската кралица. Во книжарниците владее лудило за книгата „Nostradamus: The Complete Prophecies for the Future“ (Нострадамус: Целосни пророштва за иднината), напишана од Марио Рединг.
Седум дена пред смртта на кралицата биле продадени само 5 примероци од оваа книга. Меѓутоа, откако таа почина, т.е. во периодот од 8 до 15 септември се продале дури 8 илјади примероци, пишува Sunday Times.
Така, во книгата, меѓу другото, се наведува и она Нострадамусово „предвидување“: „Кралицата Елизабета II ќе умре во 2022 година на 96 години“.
Инаку, многу луѓе ширум светот веруваат дека Нострадамус е генијалец затоа што го „предвидел“ Големиот пожар во Лондон, доаѓањето на Хитлер на власт и многу други настани. Некои дури тврдат дека знаел кога ќе започне војната во Украина.
