Македонските фудбалери не беа единствените кои синоќа славеа влез на ЕУРО 2020.
Шкотските фудбалери синоќа ја победија Србија по изведени пенали и се пласираа на Европското фудбалско првенство, а еден детаљ на крајот од мечот остана особено впечатлив.
Александар Митровиќ го шутираше последниот пенал, голманот на Шкотска Дејвид Маршал го одбрани неговиот удар и во исто време сите шкотски играчи истрчаа кон него за да слават.
Но, во моментот кога камерата го покажа голманот на Шкотска, тој изгледаше прво изненаден, а дури потоа почна да се радува.
Многумина на почетокот помислија дека тој не е свесен дека Митровиќ го изведе петтиот пенал за Србија и дека ќе се реализираат повеќе пенали, но причината за реакцијата беше друга.
Имено, Маршал гледал во судијата Антонио Матеу Лахоз веднаш по одбраната на пеналот, бидејќи не бил сигурен дали го одбранил пеналот според правилата, или ја преминал гол линијата со двете нозе пред ударот на Митровиќ.
Лахоз чекаше сигнал од ВАР собата и дури откако неговиот колега Алехандро Хернандез го извести дека одбраната е регуларна, бидејќи Маршал беше на линија со десната нога, тој го свирна крајот на натпреварот, по што шкотскиот голман започна да слави и истрча да ги прегрне своите соиграчи.
Реакцијата на Маршал, кој од синоќа го величаат како народен херој во Шкотска, наиде на многу срдечни коментари на интернет и стана вирална атракција.