Во групата Б, сите четири екипи сè уште можат да се пласираат во осминафиналето од Лигата на шампиони.
Реал Мадрид од 21 часот е домаќин на Борусија Менхенгладбах, додека во исто време Интер е домаќин на Шахтар.
Актуелниот шпански шампион го пречекува натпреварот против Германците со позитивен тон по саботната победа во првенството при гостувањето кај Севиља со резултат 1:0.
Азар и Валверде се единствените повредени во Реал
Во тимот на Зинедин Зидан се се враќаат опоравени капитенот Серхио Рамос и дефанзивецот Дани Карвахал, кои беа повредени. Поважни отсуства за Реал се оние на Еден Азар и Федерико Валверде кои уште се опоравуваат од повредите, додека сите други се на располагање за вечерашниот натпревар.
На Борусија ѝ недостасуваат тројца играчи. Поради коронавирусот, нема да игра левиот бек Рами Бенсебајни, додека повредени се стоперот Тони Јанчке и десното крило Јонас Хофман.
Реал со победа сигурно оди во осминафиналето, а во случај на нерешен резултат, Интер мора да го победи Шахтар за тимот на Зидан да се пласира во нокаут-фазата. Доколку Борусија (М) победи на стадионот „Алфредо ди Стефано“ и Интер го совлада Шахтар, Реал ќе биде исфрлен од европските натпреварувања оваа сезона.
Реал Мадрид (4-3-3): Куртоа - Васкес, Варан, Рамос, Менди - Каземиру, Крос, Модриќ - Винисиус, Родригу, Бензема.
Борусија (М) (4-2-3-1): Зомер - Лајнер, Гинтер, Елведи, Венд - Крамер, Нојхаус - Плеа, Штиндл, Тјурам - Емболо.