Во националниот парк Долината на смртта во Калифорнија, САД измерени се 54,4 степени Целзиусови, што е рекордно висока температура на Земјата откако се води веродостојна евиденција.
Националната метеоролошка служба на САД ја потврди измерената температура од 130 степени по Фаренхајтовата скала што се користи во САД.
Рекодната температура беше регистрирана среде топлотниот бран што го зафати Западниот брег на САД, каде се прогнозира дополнително покачување на температурите во текот на неделава.
Пеколните временски услови завчера предизвикаа дефекти на електрана што резултираа со дводневен прекин на снабдувањето со електрична енергија во Калифорнија.
Вчерашниот рекорд од 54,4°C беше измерен во Фурнас Крик во Долината на смртта. Претходно, највисоката температура некогаш измерена на Земјата беше 129,2 степени по Фаренхајтовата скала, односно 54°C, исто така измерена во Долината на смртта, во 2013 година.
Еден век претходно, исто така во Долината на смртта, наводно биле измерени 124 степени по Фаренхајт (56,6 степени Целзиусови), но тоа мерењ е оспорувано. Некои современи метеоролози сметаат дека пред 100 години била направена грешка во мерењето таму и на неколку други места низ светот каде биле измерени локали рекордно високи температури.
Според анализата на метеоролошкиот историчар Кристофер Барт од 2016 година, се оспорува уште еден рекорд – измерените 131F(55°C) во Тунис во 1931 година. Барт вели дека за ова мерење, како и за сите други мерења направени во Африка во колонијални времиња, тешко е да се најде кредибилна потврда.
Метеоролошката служба го дефинира топлотниот бран како период од два до три дена со многу жешко и влажно време и температура над 90F (32°C).
Центарот за контрола и превенција на болести на САД нагласува дека повеќе луѓе умираат како последица на топлотни бранови отколку од која било друга временска непогода во земјата.
Покрај оптоварувањето на електричната мрежа и прекините на напојување со електрична енергија, есктремната жештина може да приземји авиони, да стопи асфалт и да предизвика загревање на внатрешноста на автомобилите до нивоа опасни за луѓето и животните.
Топлотните бранови исто така може да имаат погубни последици за земјоделието, од пресушување, поттикнување наезда од инсекти, до пожари.