Реквизитерката Хана Гутиерес-Рид, која беше задолжена за оружјето на снимањето на „Rust“, е осудена на 18 месеци затвор за убиството на снимателката Хејлин Хачинс.
Имено, реквизитерката минатиот месец беше прогласена за виновна за убиство од небрежност на снимателка, која беше застрелана од актерот Алек Болдвин во 2021 година на сетот на филмот „Rust“. Според судскиот извештај, таа ја добила максималната можна казна.
„Не слушнав дека преземате одговорност во вашите изјави. Рековте дека ви е жал, но не и дека ви е жал за она што го направивте. Сами го претворивте безбедното оружје во смртоносно оружје“, рече судијката Мери Марлоу Сомер при објавувањето на казната.
Според странските медиуми, Гутиерес-Рид немала видлива реакција на казната. По изрекувањето на пресудата таа беше изнесена од судницата.
Пресудата доаѓа повеќе од две години откако Хачинс (42) беше убиена на 21 октомври 2021 година од вистински куршум испукан од пиштол што го држеше актерот Алек Болдвин. Во престрелката беше повреден и режисерот на филмот.
Сепак, иако Болдвин пукаше, Гутиерес-Рид беше одговорна за безбедноста и складирањето на огненото оружје на снимањето. На судењето утврдиле дека таа го прекршила протоколот за безбедност и несовесно постапувала при извршувањето на должноста, што довело до смрт на снимателката.
Нејзиниот адвокат Џејсон Боулс тврди дека 26-годишната девојка е „жртвено јагне“ за безбедносните пропусти на менаџментот на филмскиот сет и другите членови на екипажот. Тој бараше Гутиерес-Рид да биде на условна казна, бидејќи таа нема криминално досие. Но, бидејќи не ја добија посакуваната казна, адвокатот за медиумите изјави дека планираат да се жалат.
Алек Болдвин исто така е обвинет за убиство од небрежност и се очекува да му се суди во јули. Тој се изјасни за невин и тврди дека не го повлекол чкрапалото од огненото оружје.