Реквизитерката Хана Гутиерес-Рид, која беше задолжена за оружјето на сетот на филмот „Rust“, е прогласена за виновна за убиство од небрежност на снимателката Хејлин Хачинс.
За време на процесот, беше утврдено дека Гутиерес-Рид го наполнила пиштолот на актерот Алек Болдвин пред да пукне и да ја убие фотографката во 2021 година, јавува BBC.
Реквизитерката се соочуваше со обвинение за ненамерно убиство и ѝ се судеше за наводно носење на вистински куршуми за Colt .45 на снимањето на вестернот.
Оваа 26-годишна жена е прогласена за невина по втората точка од обвинението - манипулација со докази.
По оваа пресуда таа може да добие до 3 години затвор.
Актерот Алек Болдвин исто така се соочува со обвиненија за убиство од небрежност во смртта на Хејлин Хачинс. Хачинс беше убиена откако пиштолот што Болдвин го користел на проба испукал вистински куршум на сетот на филмот во Ново Мексико.
Обвинителите им тврдеа на поротниците дека Гутиерес-Рид, која го надгледувала оружјето во филмот, постапила невнимателно кога го наполнила пиштолот и не успеала да се погрижи пиштолот да биде наполнет само со лажни куршуми.
„Овој случај е попврзан со стални, непрестајни безбедносни пропусти што резултираа со смрт на човечко суштество“, рече обвинителката Кари Ти Морисеј за време на завршните зборови во средата. Гутиерес-Рид била „немарна“, „невнимателна“ и „непромислена“ кога не забележала дека вистинските куршуми се измешани со лажни куршуми во кутија со муниција на снимањето, рече Морисеј пред поротниците.
Еден од тие куршуми бил во огненото оружје што го користел Болдвин, соопштија обвинителите. Гутиерес-Рид не сведочеше на судењето, но нејзиниот адвокат, Џејсон Боулс, во завршните зборови тврдеше дека обвинителите не успеале да докажат дека неговиот клиент е единственото лице одговорно за фаталното пукање.
„Гутиерес-Рид е лесна мета, најмалку моќната личност на сетот. Лесно жртвено јагне“, рече нејзиниот адвокат во воведното соопштение на судењето.
Судењето на Алек Болдвин за убиство од небрежност е закажано за 10 јули. Обвиненијата против Болдвин веќе еднаш беа отфрлени.