Руската државна вселенска агенција Роскосмос одби да лансира интернет-сателити OneWeb, барајќи гаранции дека нема да се користат за воени цели и барајќи од Велика Британија да го продаде својот удел во компанијата.
Лансирањето на интернет-сателитите требаше да се изврши утре, со помош на руската ракета „Сојуз“, но тоа нема да се случи. Раководителот на Роскосмос – Дмитриј Рогозин изјави дека агенцијата ги посочила своите барања како одговор на санкциите што Велика Британија ги воведе кон Русија по инвазијата во Украина.
Меѓу другото, Британците им забранија на руските бродови да влегуваат во нивните пристаништа и го санкционираа најголемиот дел од рускиот финансиски систем.
Британскиот секретар за бизнис и енергија, Кваси Квартенг, изјави дека барањата на Роскосмос нема да бидат исполнети бидејќи британската влада нема да го продаде својот удел. Тој додаде дека во тек се разговори со другите акционери за да се договорат следните чекори.
Рогозин рече дека ќе ѝ даде рок од два дена на Велика Британија да го промени својот став.
До денес, 428 OneWeb сателити се поставени во ниската Орбита на Земјата со помош на ракетата „Сојуз“. Компанијата има намера да обезбеди глобална интернет-покриеност користејќи 648 сателити, како што е првично предвидено.
Во меѓувреме, SpaceX испорача сателитски интернет-терминали за Starlink во Украина, по ветувањето за помош од Илон Маск. Се верува дека украинската Влада ќе го користи ова за земјата да остане приклучена на интернет за време на воениот судир.