Прекинат е извозот на руски гас во Финска, потврди финската државна компанија Gasum, пренесуваат странските агенции.
„Многу е жално што сега ќе биде запрено снабдувањето со природен гас според нашиот договор за снабдување. Сепак, внимателно се подготвивме за оваа ситуација и се погриживме да нема прекини во мрежата за пренос на гас“, соопшти вчера финската компанија за гас Gasum, додавајќи дека поставила заменски мрежи за снабдување по добиеното известување од Газпром дека од сабота наутро ќе го прекинат снабдувањето со природен гас.
Gasum одби да му плати на Газпром за гас во рубли како што побара Русија од европските земји.
„Газпром експорт го информираше Gasum во петокот попладне, на 20 мај, дека снабдувањето со природен гас за Финска според договорот со Gasum ќе биде прекинато во сабота, 21 мај во 4 часот по Гринич“, рекоа од Gasum.
Компанијата ќе продолжи да ги снабдува финските клиенти со гас од други извори преку гасоводот Balticconnector.
Иако најголемиот дел од гасот што се користи во Финска доаѓа од Русија, гасот сочинува само 5 отсто од годишната потрошувачка на енергија во земјата.
Финска поднесе барање за влез во НАТО оваа недела, потег што ја налути Русија, која долго време се жалеше дека западниот одбранбен блок навлегува премногу блиску до нејзините граници, и која ја започна својата инвазија на Украина, меѓу другото, за да ја запре владата на таа земја да го разгледа членството во НАТО и посилните врски со Западот.
За кои европски земји Русија ја прекина испораката на гас?
Финска не е единствената европска земја на која Русија го прекина снабдувањето со гас.
Минатиот месец руската државна енергетска компанија Газпром го прекина снабдувањето со гас за Полска и Бугарија, откако тие, како и Финска, одбија да платат за гас во рубли.
Сите три земји-членки се ЕУ, која инсистира плаќањата да продолжат да се вршат во евра; што значи дека и другите членки на Европската Унија би можеле да се соочат со истиот проблем кога ќе дојде време да платат за испорака на тој извор на енергија.
Во меѓувреме, рускиот претседател Владимир Путин рече дека планира да разговара со Газпром за можноста за зголемување на испораките на природен гас за Калининград; Руска територија меѓу Литванија и Полска.