Пожар избувна во болница во Санкт Петербург, при што загинаа пет пациенти со COVID-19 сместени во Одделението за интензивна нега.
Пожарот најверојатно избувнал поради краток спој во респиратор, објавија руските новински агенции.
Евакуирани се 150 луѓе од болницата, а пожарот е ставен под контрола, соопшти рускиот министер за вонредни ситуации. Не е познато колку пациенти, вработени и посетители во болницата се повредени во пожарот.
Сите пациенти кои загинаа биле на респираторна поддршка и изгореле живи бидејќи немало можност да се изнесат навреме од болничките соби.
„Респираторите работат до крајни граници. Прелиминарните индикации се дека еден од респираторите бил прегреан и се запалил“, изјави извор од Службата за итна помош на Санкт Петербург за новинската агенција Interfax.
Инцидентот се случи во време кога руските власти почнаа да ги олабавуваат рестриктивните мерки во земјата.
Русија е трета земја во светот со најголем број на потврдени случаи на COVID-19. Вчера беше регистриран рекорден раст на бројот на заболени, со 11.656 нови случаи, со што вкупниот број на заболени порасна на 221.344.
Денешниот пожар е втор ваков инцидент за неколку дена во Русија. Во саботата, во пожар на Одделението за интензивна нега во болница во Москва загина еден пациент со COVID-19, а евакуирани беа 200 луѓе.