Почина лидерот на опозицијата, Алексеј Навални (47), кој издржуваше затворска казна во регионот Јамало-Ненец на крајниот север на Русија. Ова го соопштија руските новински агенции повикувајќи се на управата на затворот, а пренесува Reuters.
„Денеска, во казнената колонија бр. 3 осудениот А.А. Навални се чувствувал лошо по прошетката и речиси веднаш потоа ја загубил свеста. На местото веднаш била повикана екипа за итна медицинска помош, која веднаш пристигнала. Преземени се сите мерки за реанимација, но не дале позитивен резултат. Лекарите од итната помош ја констатирале смртта на осуденикот“, се вели во соопштението на руската затворска управа.
Навални, најистакнатиот критичар на претседателот Владимир Путин во Русија и жесток противник на војната во Украина, издржуваше 19 години затвор за измама, непочитување на судот и прекршување на условната казна. Навални и многумина на Запад ги отфрлија тие обвинувања како измислени и политички мотивирани.
