САД не веруваат дека постои закана Русија да употреби нуклеарно оружје, и покрај неодамнешното заострување на реториката на Москва, изјави денеска неименуван висок претставник на американската одбрана.
„Продолжуваме да ги следиме нивните нуклеарни капацитети секој ден и нашите проценки се дека нема закана од употреба на нуклеарно оружје или закана за територијата на НАТО“, додаде функционерот во изјава за американски медиуми.
Рускиот министер за надворешни работи Сергеј Лавров изјави во понеделникот дека Западот не треба да го потценува зголемениот ризик од нуклеарен конфликт во Украина.
Русија претходно овој месец соопшти дека до есен планира да ги распореди своите новоиспробани интерконтинентални балистички ракети Сармат, способни за нуклеарни напади врз САД.
Западната загриженост за ризикот од нуклеарна војна се зголеми откако претседателот Владимир Путин ја почна руската инвазија на Украина на 24 февруари со говор во кој остро се осврна на нуклеарните сили на Москва и предупреди дека секој обид да се застане на патот на Русија „ќе ве доведе до такви последици кои никогаш не сте ги сретнале во вашата историја“, јавија западни медиуми.
