Еден од најдобрите фудбалери на светот, Египќанецот Мохамед Салах, не ја исклучува можноста да заигра и во Ла Лига.
Нормално, доколку некогаш замине на Пиринеите, многу веројатно е дека тоа би било или во Реал Мадрид или во Браселона, бидејќи играч од негов калибар може да да се пресели единствено од еден гигант во друг.
Во интервју за шпанска Marca по повод претстојниот четвртфинален дуел од Лигата на шампионите на неговиот Ливерпул против Реал Мадрид, Салах не сакаше да зборува конкретно, но сепак ја остави вратата подотворена за во иднина.
„Не зависи од мене. Ќе видиме што ќе се случи, но искрено не би сакал да зборувам за тоа“, вели тој.
Шпекулациите велат дека лошата сезона на Ливерпул ги влошила односите помеѓу него и тренерот Јирген Клоп и поради тоа можеби уште на лето би си заминал. Салах тоа го демантира.
„Мојот однос со Клоп е еден сосема нормален однос помеѓу двајца професионалци. Така би го опишал“.
Со оглед на тоа што Салах досега играше во Премиер лигата и во Серија А (играше за Фиорентина и Рома), неизбежно прашање е и дали би сакал еден ден да се проба и во Ла Лига.
„Зошто да не? Никој не знае што ќе се случува во иднина, така да... можеби еден ден, да. Се надевам дека ќе можам уште многу години да играм фудбал“, вели египетската ѕвезда.
Ливерпул го пречекува Реал тек на 14 април, има две недели до тогаш, а Салах има голема почит кон предводникот на „Кралевите“, Зинедин Зидан.
„Тој е одличен тренер. Трипати ја освои Лигата на шампионите. Едноставно, одлично си ја врши работата со тимот. Си замина, а потоа се врати да му помогне на тимот повторно да освојува трофеи. Тој беше еден од моите идоли кога бев мал. Неверојатен стратег е“, упати низа пофалби Салах, меѓу редови навестувајќи во кој шпански гигант би се преселил еден ден.
Салах за време на интернационалната пауза беше со репрезентацијата на Египет за која ги одигра двата последни квалификациски натпревари за пласман на Африканскиот куп на нации. По 90 минути одигра и во ремито 1:1 на гости кај Кенија, и во победата од 4:0 дома над Комори каде постигна и два гола. Египет како прв во групата избори пласман на завршницата која поради пандемијата е поместена за периодот јануари-февруари 2022 година.