Идејата градското дерби меѓу Лацио и Рома да се игра веднаш по обврските на двата римски клуба во Европа не му се допаѓа на тренерот на „Бјанкочелестите“, Маурицио Сари.
Искусниот стручњак зборуваше веднаш по натпреварот од Лигата на шампионите против Фејнорд, кој неговиот тим го доби со 1:0, за тоа како тоа не е паметен потег.
„Личноста која одлучила натпреварот со Рома да се игра истата недела кога на програмата се европските натпревари не е најинтелигентната личност на светот. Имам впечаток дека луѓе кои немаат врска со фудбалот си правеле распореди и одлучувале кога ќе се играат натпреварите“, луто рече Сари.
Според неговите зборови, Рома ќе има полесна работа против прашка Славија в четврток отколку неговата екипа во вторникот против Фејнорд, бидејќи и „Волчицата“ и чешкиот тим имаат практично обезбеден пласман во понатамошниот тек од натпреварувањето.
„Синоќа имавме војна против Фејнорд, а Рома може да си дозволи натпревар како пријателски против Чесите. Имаат таква позиција во групата што можат да ги одморат играчите“, истакна Сари, но неговите зборови сигурно нема да му се допаднат на тренерот на Рома, Жозе Мурињо.
Дерби дела Капитале е закажано за недела, 12 ноември во 18:00 часот. Домашниот Лацио влегува како десеттопласирана екипа на табелата во Серија А со 16 освоени бодови, додека Рома има бод повеќе и е на седмото место.
