Поранешниот претседател на Франција, Никола Саркози, веќе втор ден е на испитување во полицијата поради тврдења дека неговата кампања во 2007 година ја финансирал Гадафи.
Саркози утрово излегол од својата куќа во Париз заедно со адвокатот, со кој потоа отишол во канцеларијата на судските истражувачи, каде било извршено испитувањето.
Саркози вчера наутро беше приведен на разговор во полицијата, поради истрага во врска со финансиски нерегуларности во текот на неговата изборна кампања во 2007 година.
Истрагата се води поради сомненија дека Саркози незаконски примил повеќе милиони евра од некогашниот либиски лидер Моамер Гадафи.
Саркози и неговиот поранешен член на персоналот негираат дека направиле нешто погрешно во овој случај, кој вклучувал наводни криминални дејствија при финансирањето на неговата победа на претседателските избори во 2007 година.
Истражувачите испитуваат дали режимот на Гадафи тајно му дал на Саркози вкупно 50 милиони евра за кампањата од 2007 година, што би било значително над легалната граница за финансирање на кампања, која во тоа време изнесувала 21 милион евра.
Покрај тоа, наводното плаќање на кампањата на Саркози ги прекршило и француските прописи, според кои се забранува финансирање од страна и се бара објавување на изворот на средства за водење на кампања.
Саркози беше претседател на Франција од 2007 до 2012 година.
