Аргентинскиот фудбалер Мауро Икарди и неговата сопруга (и воедно негов агент) Ванда Нара повеќе не се заедно, објави Ванда на својот профил на Instagram.
Медиумите во Италија пишуваат дека споменатата двојка се разделува после 8 години брак, а заедно имаат две ќерки. Иако во последните месеци постоеја сомневња дека еден од најпознатите парови во светот на спортот ќе стави крај на врската, сега Ванда и официјално го потврди тоа со објава на Instagram.
„Многу е болно да се живее овој момент. Но, со оглед на мојата експонираност и работите што ги надминуваат медиумските шпекулации, подобро е тоа да го дознаат од мене. Немам што повеќе да појаснам и нема да давам детали за оваа разделба. Ве молам имајте разбирање, не само за мене, туку и за нашите деца“, вели таа во пораката што ја објави на стори.
Мауро и Ванда со месеци имаат многу проблеми во и онака турбулентната врска, а минатата година таа го обвини дека ја изневерува, поради што привремено ја прекинаа врската. Сепак, неколку месеци потоа успеаја да најдат заеднички јазик и да се помират, но очигледно тоа не траеше долго.
Во 2008 година Ванда се омажи за Макси Лопес, аргентински напаѓач, со кој имаше три сина, а парот се разведе во 2013 година по серија меѓусебни обвинувања за брачно неверство. Во епилогот од приказната со Макси Лопес, Ванда започна врска со Икарди, соиграч на Макси и човек кој важеше за еден од неговите најдобри пријатели.
Подоцна во приказната се вклучи целата аргентинска јавност, јасно поради која причина, како и соблекувалната на аргентинската фудбалска репрезентација, а тамошните медиуми пишуваа дека Меси им забранил на селекторите да го повикуваат Икарди во репрезентацијата и дека токму тоа е причината зошто никогаш не доби шанса во репрезентацијата, што можеби ја заслужуваше.
Икарди и Ванда, и покрај сѐ, се венчаа во 2014 година, а добија две ќерки - Франческа и Изабела. Во меѓувреме, Ванда стана агент на Мауро и беше главен двигател на неговиот трансфер од Интер во ПСЖ, а сега и во Галатасарај.
