Threads веќе почна да се соочува со губење на дневно активни корисници откако првичната еуфорија помина.
Апликацијата Threads, која е одговорот на Instagram за Twitter, имаше огромен успех од нејзиното лансирање. Седум дена по лансирањето, таа доби повеќе од 100 милиони корисници, што ја прави најбрзо растечката апликација досега.
Сепак, како што обично се случува, „секое чудо за три дена“, па возбудата за новата апликација веќе згасна. Според новите извештаи од SimilarWeb, бројот на дневно активни корисници на Threads е преполовен во споредба со првата недела од лансирањето.
Така, Threads забележа пад од 49 милиони дневни активни корисници на 23,6 милиони за само една недела.
Додека многумина веруваат дека Threads би можело да биде првата апликација која „ќе го убие“ Twitter, ќе мора да се случат значителни промени.
Со исклучок на првата недела од лансирањето, Threads сега е околу една петтина од големината на Twitter, и слично кога се гледаат дневните статистики на активни корисници. Twitter моментално има околу 110 милиони активни корисници дневно.
Иако ја носи титулата најбрзо растечка апликација од нејзиното лансирање, услугата сега има тешка работа да го задржи својот раст со текот на времето додека се натпреварува со жестоката конкуренција на пазарот.
