Во тек е процес на разговори за измени на Кривичниот законик во кој, меѓу другите, се вклучени и претставниците на невладиниот сектор, рече владиниот портпарол Душко Арсовски одговарајќи на новинарско прашање за барањата на сексуалните работнички за декриминализација на нивната работа.
-Барањата во моментов се разгледуваат, измените на Кривичниот законик се очекува многу скоро да бидат на седница на Влада. Се воведуваат нови кривични дела, како што се полов напад и полово вознемирување. Тоа ги опфаќа сите лица, жени, меѓу кои, секако, се и сексуалните работнички, рече Арсовски.
Сексуалните работници денеска во Скопје, под мотото „Црвениот фустан добро ми прилега“, го одбележаа Меѓународниот ден на сексуалните работници – 2 Јуни, и порачаа дека е потребно унапредување на нивните здравствени, социјални и работнички права.
Заедницата на сексуални работници бара признавање на сексуалната работа како професија по слободен избор, со што таа ќе стане дел од пазарот на трудот, а сексуалните работници ќе бидат препознати како работници.
„Декриминализацијата на сексуалната работа е клучно барање на сексуалните работници, нивните поддржувачи и здруженија. Декриминализацијата е единствен модел кој ќе овозможи почитување на човековите права на сексуалните работници, унапреден пристап до здравствени и социјални услуги, како и вклучување на сексуалната работа во формалната економија со што овие работници конечно ќе добијат работнички права. Од декриминализацијата на сексуалната работа има бенефити целото општество, особено кон превенција од родово засновано насилство, превенција од сиромаштија, социјална нееднаквост како и трговија со луѓе. Моделот на декриминализација на Нов Зеланд го сметаме за најуспешен, според кој треба да се ревидираат политиките кои ја уредуваат сексуалната работа во Р.С. Македонија“, изјави Драгана Дрндаревска од Коалиција МАРГИНИ на денешниот настан во организација на ХОПС - Опции за здрав живот Скопје, со партнерските организации од Платформата за декриминализација на сексуалната работа, Здружение за поддршка на маргинализирани работници STAR - The First Sex Workers Collective in the Balkans и Коалиција МАРГИНИ. На настанот присуствуваа сексуални работници, нивни пријатели, поддржувачи и активисти кои испратија барања за унапредување на човековите права на сексуалните работници преку декриминализација на сексуалната работа.