Членовите на семејството на поранешниот политички водач на босанските Срби Радован Караџиќ, кој беше осуден за воени злосторства извршени во војната во БиХ во 90-тите, во вторникот го тужеа американското Министерство за финансии за останување на списокот со санкции на САД.
Сопругата на Караџиќ, Љиљана, синот Александар и ќерката Соња изјавија во тужбата до федералниот суд во Вашингтон дека Канцеларијата за контрола на странски средства (OFAC) на Министерството за финансии, која ги спроведува американските санкции, неоправдано ја одолговлекува одлуката дали да им се укинат санкциите.
Портпаролот на Министерството за финансии не одговори веднаш на барањето на Reuters за коментар.
Тројцата беа санкционирани од американската влада во 2003 година, откако беа осомничени дека му помагале на Караџиќ додека тој се соочуваше со обвинение од судот во Хаг за злосторства поврзани со геноцидот врз муслиманите во Босна.
Семејството тврди дека не му помогнале на Караџиќ да го избегне апсењето.
Радован Караџиќ беше уапсен во 2008 година, а подоцна осуден на доживотен затвор за неговата улога во масакрот во Сребреница, кога силите на босанските Срби убија повеќе од 8.000 муслимански мажи и момчиња во јули 1995 година.
Неговото семејство соопшти дека во 2020 година почнало да поднесува петиција до Министерството за финансии за да ги отстрани од списокот на санкционирани лица, познат како списокот „Специјално oзначени државјани“.
Тоа што се на списокот ги чинеше можности за вработување, ги спречи да отворат банкарски сметки и неправедно ги жигоса, се вели во тужбата.
И покрај тригодишните дискусии меѓу OFAC и адвокатот на семејството, OFAC допрва треба да се произнесе за ниту едно од трите барања, велат тие.
„Не е фер некој да чека толку долго за одлука“, изјави семејниот адвокат Питер Робинсон.
Во тужбата се бара од судот да му наложи на OFAC да се произнесе по нивните барања во рок од 30 дена и да додели адвокатски надоместоци.
