Николо Ѕаниоло (23) беше миленик на навивачите на Рома и му се предвидуваше дека ќе го наследи Франческо Тоти.
Минатата пролет младиот напаѓач и италијански репрезентативец се вброи меѓу легендите на клубот, кога го постигна единствениот гол во финалето на Европа конференциската лига против Фејнорд за првиот европски трофеј на Рома. Сепак, имаше шокантен пресврт оваа сезона.
Миленикот на Рома на крајот побара заминување од клубот во зимскиот преоден рок. Ова ги разбесни навивачите, а од клубот по првичниот шок порачаа дека тој може да си замине, но само со обештетување од 35 милиони евра и дека не доаѓа предвид ниту една позајмица, како и дека е отпишан од првиот тим. Многу клубови го посакуваа Ѕаниоло, но само Борнмут и Милан беа конкретни.
Проблемот е што првите, иако ја понудија бараната сума, Ѕаниоло не е заинтересиран за нив, а вторите се неговата посакувана дестинација, но на Рома не можеа да ѝ понудат повеќе од 25 милиони евра. Така Ѕаниоло остана во Рома против негова, клупска и навивачка волја, а по 31 јануари и завршувањето на преодниот рок во најсилните лиги, беше осуден да тренира со младинскиот тим до лето.
Турскиот лидер Галатасарај му понуди сензационална понуда за спас, а Ѕаниоло ја прифати и ја напушти Рома за која постигна 24 гола на 128 натпревари и намести 18. Во Турција преодниот рок трае до утре, а Џанлука Ди Марцио и Фабрицио Романо, најсигурни извори од „меркатото“, пренесуваат дека клубовите и играчот се договориле за сè и дека Ѕаниоло попладнево лета за Истанбул за да потпише договор за Галатасарај на три и пол години со годишна плата од 3,5 милиони евра.
Споменатите извори наведуваат дека Рома сепак се согласила значително да го намали претходното побарување за обештетување и дека ќе добие меѓу 20 и 22 милиони евра. Без разлика на попустот што го доби Галатасарај, и со ова обештетување Ѕаниоло станува убедливо најскапиот дојдовен трансфер во историјата на Турција. Трансферот доаѓа во најлошото време за Турција, еден ден по катастрофалниот земјотрес што ја погоди земјата и во кој загинаа најмалку пет илјади луѓе.
