Поранешната американска глумица Меган Маркл, сопруга на британскиот принц Хари, вчера ја почна својата интернет-емисија во којашто ќе ги разоткрива клишеата за жените, како што се најавува. Нејзина прва гостинка беше тениската ѕвезда Серена Вилијамс.
Најавените 12 епизоди од „Archetypes“ – име што потсетува на името на нејзиниот син Арчи, ќе бидат полни „интимни и искрени“ разговори меѓу восителката и нејзините гости. Ова се наведува во претставувањето на емисијата на мобилната апликација Spotify.
Во првата епизода, Маркл и Вилијамс, инаку пријателки од Лос Анџелес, зборуваат, меѓу другото, за амбицијата и различните значења што зборот може да ги има кога се однесува на жената.
– Не се ни сеќавам дека лично ја почувствував негативната конотација на зборот „амбициозни“ додека не почнав да излегувам со мојот сопруг (принцот Хари, б.н.). И очигледно, според некои, амбицијата е ужасна работа – барем кога се однесува на жените, вели Меган.
На почетокот на август, Вилијамс објави дека ќе се повлече од теренот по 25 години и 23 Грен слем титули. Таа рече дека сака „да се сосредоточи на тоа да биде мајка“ и на нејзините духовни цели.
Принцот Хари и Меган се откажаа од кралскиот живот во Обединетото Кралство во 2020 година и се преселија во Калифорнија, каде што сега живеат со своите две деца. По пристигнувањето во САД, тие создадоа неколку соработки, вклучително и профитабилни партнерства со Netflix и Spotify. Се очекува принцот Хари да ги објави своите мемоари до крајот на годината.
