Граѓанската иницијатива Шанса за Центар, која има свои советници во Општина Центар, објави куп фотографии од шареното лудило кое владее низ централната скопска општина каде со години не се внимава како се „украсуваат“ тротоарите и улиците.
„Велат 'колку луѓе, толку табиети'. За Центар ова може да се адаптира и во 'колку градоначалници, толку табиети и уште повеќе различни видови на плочки'“, разочарано велат од Шанса за Центар.
Како што доаѓа нов градоначќалник, така парчињата крпеници на градските тротоари и улици се „реновираат“ по ноив терк, без да сае внимава на тоа дали новиот дел се вклупува во амбиентот.
„А вкусовите на тендерите, или тоа што имало на 'лагер' кај добавувачите се толку различни што заедничките јавни пешачки површини повеќе ни наликуваат на изложбен салон за плочки на отворено...“
„Погледнете ги местата каде се спојуваат различните дезени и типови. Би дозволиле мајстор вака да ви уреди по дома? Можеби е крајно време да се унифицира и стандардизира изгледот, квалитетот и функционалноста на пешачките и велосипедските подлоги? Доколку насекаде се употребуваат истите материјали тоа ќе биде и поевтино за одржување и поправање и изведбата ќе биде полесна за планирање“, предложува Шанса за Центар.
Тешко дека такво нешто ќе дочекаат центарци. Бидејќи секогаш локалната власт има изговори од типот „тоа го направи претходната власт“.
„Но, за такво нешто треба отвореност во комуникацијата од страна на општината и јавно објавување на проектите за реконструкции на улици и јавни површини пред да бидат финализирани за да може да се дадат и вклучат сугестии и идеи. Таков 'луксуз' сѐ уште немаме...“, завршуваат од Шанса за Центар.
Граѓанската иницијатива Шанса за Центар како независна советничка листа на локалните избори во 2021 година освои 3 советнички места во Советот на Општина Центар.
Фотографиите, над 40 на број, можете да ги погледнете во нивната објава на Facebook:
