Енергетската компанија Shell денеска соопшти дека ќе престане да купува руска нафта и гас и ќе ги затвори своите бензински пумпи во таа земја.
Британско-холандската компанија во соопштение рече дека „постепено“ ќе престане да користи сирова нафта, нафтени деривати, природен гас и течен природен гас од Русија.
Украинскиот министер за надворешни работи пред неколку дена ја критикуваше Shell дека продолжува да купува руска нафта, односно дека продолжува да работи со владата на претседателот Владимир Путин.
„Ние сме целосно свесни дека нашата одлука минатата недела да купиме одредена количина руска сирова нафта за да се рафинира во производи како што се бензин и дизел не беше правилна, иако беше донесена со цел да се стабилизира синџирот на снабдување. Се извинувам“, изјави извршниот директор Бен ван Берден.
„Како што веќе рековме, добивката од преостанатите количества руска нафта ќе ја пренасочиме во наменски фонд“, додаде тој.
Украинскиот министер за надворешни работи Дмитро Кулеба рече дека Shell „дискретно“ купила нафта во петокот и ја повика јавноста да изврши притисок врз компанијата.
„Едно прашање за Shell: Зарем руската нафта не мириса на украинска крв?“ напиша Кулеба на Twitter.
„Ги повикувам совесните луѓе ширум светот да побараат од мултинационалните компании да ги прекинат сите деловни врски со Русија“, додаде тој.
Зголемување на цените на нафтата
Дискусиите за забрана за увоз на нафта од Русија во понеделникот ги подигнаа цените на највисоко ниво од 2008 година, на 139 долари, поттикнати од стравувањата дека САД и Европа би можеле да го забранат увозот на руска нафта. Во текот на денот ситуацијата малку се смири и цената се лизна на 123 долари.
Од почетокот на руската инвазија на Украина, цените се зголемија за околу една третина.
Тие го достигнаа највисокото ниво од почетокот на тргувањето на финансиските пазари во летото 2008 година, кога со барели се тргуваше по речиси 150 долари, потсетува агенцијата dpa.
