Босанскиот стратег Бруно Акраповиќ од денеска веќе не е тренер на Шкендија, потврди попладнево актуелниот македонски фудбалски шампион.
– Двете страни постигнаа заемен договор за прекин на соработката и сметаат дека тоа во овој момент е од обостран интерес, соопшти Шкендија.
Акраповиќ заминува од тетовскиот клуб 14 месеци откако по втор пат се врати на клупата на Шкендија, која ја предводеше и во периодот од октомври 2015 до декември 2016 година.
Прекинот на соработката со Акраповиќ доаѓа по вчерашното реми без голови во Тетово против претпоследно пласираниот Борец.
Шкендија по 25 одиграни прволигашки кола е второпласирана со ист број бодови (48) како и Академија Пандев на третото место, 13 помалку од лидерот Шкупи.