Искусниот репрезентативец на Северна Ирска, Кајл Лаферти (35) е строго казнет поради видеото на кое се гледа како користи зборови кои се користат како погрден сленг за католиците.
По тој случај Лаферти веднаш ја доби првата санкција бидејќи беше отстранет од репрезентативниот собир за натпреварите од Лигата на нации, а сега стигна и одлуката со уште потежок удар за овој искусен играч.
Имено, Шкотската фудбалска асоцијација го казни Лаферти со казна од 10 натпревари, што е важно во неговиот случај бидејќи клупската кариера ја гради во дресот на Килмарнок, член на шкотската Премиер лига.
Така, искусниот напаѓач сега го чека прилично долга пауза поради неговите зборови, кои очигледно не мислел дека ќе бидат снимени и раширени толку брзо.
Инаку, спорен беше изразот „Pack of Fenian bastards“ што се користи за погрдно именување на католиците, а Лаферти го употреби за вербална навреда на навивачот на Селтик на кој му се обраќаше за време на неговото излегување в град.
По одредената суспензија, искусниот фудбалер би требало да се врати на терените дури во јануари, а интересно е што неговиот камбек натпревар треба да биде дуел токму против Селтик во рамките на Шкотскиот куп.
Лаферти одигра 85 натпревари во дресот на Северна Ирска, постигна 20 гола, а селекторот Баракло подвлече дека сѐ уште не го отпишал искусниот фудбалер од својот тим. Беше дел од неговиот национален тим при оној сензационален пласман на ЕУРО 2016, каде Северна Ирска успеа дури и да ја мине групната фаза. Лаферти не постигна гол на завршниот турнир.
Интересно, кога се венчаше со својата прва сопруга, шкотската и британската мисица од 2010 година Никола Мимнаг, тоа го направи во римокатоличката црква Сент Маргарет во градот Џонстон.
