Нема кој не забележа само момент пред Меси да го добие златниот пехар на ФИФА дека емирот на Катар на рамената му стави проѕирна црна наметка, па сите останаа со прашањето што е таа наметка и зошто Меси ја доби.
Емирот на Катар, Тамим бин Хамад Ал-Тани, на рамената на Лионел Меси синоќа стави црна наметка која потоа Аргентинецот малку се помачи да ја облече не можејќи да ги најде отворите за рацете. Беше изненаден од потегот, а се чини и малку засрамен, но потоа се насмевна. Тоа се случи во моментот кога Меси застана помеѓу него и претседателот на ФИФА, Џани Инфантино, за да го прими златниот пехар за штотуку освоеното Светско првенство.
Станува збор за бишт (بِشْت), една од најпрестижните арапски наметки која претставува благосостојба и благородништвото, истакнувајќи го општествениот статус на оној што ја носи, истовремено предизвикувајќи почит од останатите. Ја носат само владетели, племенски водачи и водечки лица за време на важни церемонии.
Биштот е типичен за Артапскиот Полуостров, особено каде што владејат емири. Најчесто е црн, може да има и друга боја, како на пример кафена, сива, беж или бела. Се носи над бела облека, како што се гледа кај Ал-Тани, емирот кој му го даде биштот на Меси.
Примерокот што го доби Меси на ракавите има позлатена линија, што го симболизира триумфот во фудбалскиотг свет, а Меси го прави крал на фудбалот.
Сите шеици присутни на финалето во Доха носеа бишт. И не случајно. Не толку поради финалето, кое е важен настан, туку поради датумот 18 декември, што за Катар има посебно значење, а затоа и овој датум беше одбран за финалниот натпревар. Имено, на 18 декември Катар го слави својот државен празник. На овој ден во далечната 1878 година шеикот Џасим бин Мохамед Ал-Тани ја обединил земјата и така настанал денешен Катар.
Меси како го крева пехарот носејќи бишт е преседан во церемонијата на ФИФА, но снимките ќе станат историски и вечно втемелени во арапскиот свет.
