Менаџерот на Ливерпул, Јирген Клоп, не крие дека би му било голема чест да стане селектор на германската фудбалска репрезентација, но дека поради својата лојалност нема баш така да ги напушти „црвените“ и дека затоа оваа можност е далеку од реализација.
Селекторот на Германија, Ханси Флик, во последните месеци е под голем притисок од јавноста поради екстремно слабите резултати, а тоа е доволно веднаш да го постави прашањето за неговите наследници и да лицитира со имињата на оние кои би биле добри за оваа функција.
Како и секогаш со Германија, прв на радарот е Јирген Клоп, а менаџерот на Ливерпул вели дека тоа би му претставувало голема чест и дека нема дилеми околу тоа. Сепак, проблем е неговата лојалност и тоа што не може да го напушти Ливерпул со кој има договор до 2026 година.
„Работата селектор на репрезентацијата би била голема чест и нема дилема. Но единствениот проблем што ми стои на патот е мојата лојалност. Не можам туку така да го напуштам Ливерпул и да станам селектор, тоа не се прави така и затоа нема можност тоа да се случи“, изјави Клоп.
Тој вели дека сè уште не знае што ќе прави откако ќе замине од Ливерпул и дека сака да ги држи отворени сите опции.
„Работата на тренерот е интересна. Но, не знам дали ќе направам нешто сосема поинакво откако ќе заминам од Ливерпул. Сакам да ги задржам сите мои опции отворени“, додаде Клоп.
Клоп е менаџер на Ливерпул од 2015 година, а со овој тим ја освои титулата во Англија, прва за „црвените“ по 30 години и титулата во Лигата на шампионите.
