Откако Германија одлучи привремено да ја прекине сертификацијата на гасоводот Северен поток 2, цела Европа стравува дека тоа ќе се одрази на цените на овој енергенс.
Енергијата е едно од клучните политички прашања на Стариот континент, а значителни количини од неа се дистрибуираат од Русија. Веќе оваа зима цените на бензинот беа рекордно високи, а руско-украинската криза е причина за страв дека ќе бидат уште повисоки.
Цените се малку пониски од минатиот Божик, но се значително повисоки отколку во 2020 година. Сепак, аналитичарите не очекуваат одлуката на Германија привремено да ја суспендира сертификацијата на Северен поток 2 драматично да влијае на цената на гасот зимава. Претходно се претпоставуваше дека овој гасовод нема да профункционира пред втората половина на 2022 година.
Заменик-претседателот на Советот за безбедност на Русија, Дмитриј Медведев, вчера, 22 февруари, изјави дека Европејците наскоро ќе плаќаат 2.000 евра за 1.000 кубни метри гас поради одлуката на Германија. Аналитичарот Том Марзек-Мансер истакна дека тоа ќе биде за 20 отсто повеќе од рекордната цена на овој извор на енергија од декември 2021 година.
Но, Европа сега е во малку подобра ситуација, во споредба со неколку месеци порано, бидејќи овој и минатиот месец увезуваше поголеми количини течен природен гас (LNG). Ова го истакна и Хенинг Глојштајн, директор за енергија, клима и ресурси во Евроазиската групација. Олеснителна околност е што зимата е релативно блага.
LNG од САД и Катар ќе ѝ помогне на Европа да ги надмине сите дополнителни тешкотии во дистрибуцијата на гас од Русија. Сепак, голем проблем би бил доколку Русија целосно го прекине снабдувањето со гас, како одговор на западните санкции, пишува CNN.
