Со својата вакцина против коронавирусот, BioNTech се искачи на врвот на светот, и од финансиска гледна точка.
Сепак, во компанијата веќе размислуваат што ќе се случи по завршувањето на пандемијата и подготвуваат огромна инвестиција во Сингапур.
Компанијата од Мајнц, Германија, го зголеми својот промет во првиот квартал од оваа година за повеќе од 70 пати во споредба со истиот период минатата година, на околу 2 милијарди евра, а профитот се зголеми за трипати во однос на претходниот квартал на околу 1,1 милијарда евра, пишува Deutsche Welle. Како што се очекуваше, ова се должи на вакцината.
„Со оглед на нашата вакцина, јас сум исклучително среќен за уникатната совршеност на нашиот тим и соработката со нашиот партнер Pfizer. До денес испорачавме над 450 милиони дози во 91 земја во светот“, рече коосновачот на BioNTech, Угур Сахин, на денешната виртуелна прес-конференција.
BioNTech сепак забележа загуба од околу педесет милиони евра во првиот квартал од минатата година, но сите трошоци за истражување и инвестиции се исплатија. Во моментов, оваа компанија работи на понатамошно зголемување на производството за да се покријат побарувачката за вакцина ширум светот што е можно поскоро. Веќе престанаа да гледаат на себе како на нов играч во светот на фармацијата, и се подготвени да ја преземат улогата на глобален концерн што ќе има работа и по завршувањето на пандемијата со коронавирусот. Нивната специјалност ќе продолжат да бидат вакцини против заразни болести, но и препарати против рак.
Кога станува збор за вакцината, BioNTech планира да формира седиште за регионот на Југоисточна Азија. Планирана е фабрика во Сингапур што ќе може да произведува до милијарда дози вакцини годишно, но тие не размислуваат само за COVID-19.
„Гледаме подалеку од COVID-19. Се надеваме дека ќе создадеме регионален и можеби глобален центар за снабдување за цела низа различни вакцини и терапевтски препарати“, изјави Сахин за весникот FAZ. Се работи за генетски модифицирани препарати за кои се предвидува дека ќе играат голема улога во медицината, сè до борба против ракот. Германската компанија не сака да зборува конкретно за висината на инвестицијата, но во секој случај, во фабриката во Сингапур ќе бидат инвестирани средства „во износ од стотици милиони американски долари“, вели коосновачот на компанијата .
Според медиумите, Сингапур лесно прифатил да учествува во инвестицијата, а централата таму треба да започне со работа во 2023 година, пишува Deutsche Welle. Сингапур ќе биде вториот чекор во проширувањето на BioNTech. Седиштето е основано и во Кембриџ во американската држава Масачусетс минатата година. Досега компанијата од Мајнц се стремеше да соработува само со Кина.
Најголемиот купувач на BioNTech сè уште е Европската Унија. Брисел очигледно нарачува многу повеќе дози од сите производители отколку што има жители во Унијата. Уште 900 милиони се веќе нарачани од BioNTech за периодот од декември оваа година до 2023 година со опција за нови 900 милиони.
Изгледа наскоро ќе има доволно дози на вакцини во ЕУ, но во посиромашните земји ситуацијата е многу полоша. Откако ова беше тема во Светската здравствена организација неколку пати, американскиот претседател Џо Бајден дозволи можност за суспендирање на патентот на вакцината против корона, за да може да се произведува во посиромашните земји. Сахин не гледа на ова како идеја што ќе направи многу во борбата против пандемијата, бидејќи дури и ако патентот беше суспендиран, ќе требаше најмалку една година за да се изгради фабрика што ќе може да произведува толку сложени препарати. Другите експерти кои ја следат работата на фармацевтскиот сектор не сметаат дека тоа ќе биде потребно: не само BioNTech, туку и други производители на вакцини веќе работат на проширување на капацитетот и во многу предвидлива иднина ќе има доволно подготовки за секого. Очигледна е и политичката волја на побогатите земји да им помогнат на сиромашните да добијат доволно вакцини за нивната популација, пишува Deutsche Welle.
