Платформата за родова еднаквост, мрежа од здруженија кои работат на унапредување на родовата еднаквост, најавија прес-конференција во врска со работата на ОЈО по случајот „Јавна соба“.
Платформата, чии членки стојат зад организирањето на протестите по актуелизирањето и непостапувањето за случајот „Јавна соба“ во почетокот на месецов, најавија прес-конференција за 24.2.2021 (среда) со почеток од 10 часот пред Јавното обвинителство (Кеј Димитар Влахов бб), Скопје.
„Бидејќи сѐ уште чекаме надлежните институции да преземат мерки за санкционирање на сите сторители во случајот ‘Јавна соба’, на прес-конференцијата ќе упатиме конкретни барања до Јавниот обвинител на РСМ, Љубомир Јовески и претседателот на Советот на јавни обвинители, Ацо Колевски. Очекуваме обвинителството да испорача конкретни резултати, кои ќе ни покажат дека нашите барања за заштита на жртвите на родово-засновано насилство започнале да се реализираат, со рок до 8 март“, велат од Платформата за родова еднаквост.
Оттаму исто така ја повикуваат јавноста да се приклучи на прес-конференцијата, „за заеднички да побараме конечно санкционирање на сите сторители во случајот ‘Јавна соба’, професионален однос на обвинителството, преку навремено, квалитетно и сеопфатно спроведување на постапките за кривичен прогон на сторителите на родово-засновано насилство“.
