По долго „крчкање“ конечно излезе најновиот албум на Суперхикс насловен како и истоимениот сингл „Сила и Нервоза“.
Овој сингл е плод на едно долгогодишно музичко скопско-битолско пријателство и носи една локална, многу вистинита порака. Снимен во студиото „Тра Ла Ла“ под продуцентска палка на Мите Димовски (освен „Скарантин“ – Ненад Трифуновски). Во снимањето на спотот и видеото учествуваа сите, вкупно на број 12 члена на овие бендови.
Албумот е веќе поставен на сите можни музички платформи, а се наоѓа и во CD формат. Следува за скоро и винилот.
Новиот албум на „Суперхикс“ денеска беше промовиран во Домот на културата „Билјана Беличанец“ во Кисела Вода. Денешната промоција на новиот албум е само една од низата активности кои ќе се случуваат по повод 30-годишниот јубилеј на овој значаен бенд, а централната манифестација ќе се случи на 29 јуни во паркот кај салата „Расадник“, каде Суперхикс со поддршка од Општина Кисела Вода ќе одржат голем славенички концерт.
На денешниот настан присуствуваше градоначалникот Орце Ѓорѓиевски.
„Чест и задоволство ми е да бидам на денешната промоција на уште еден албум од култните 'Суперхикс' со кои растеа и музички созреваа многу генерации. Драго ми е што Општина Кисела Вода е домаќин на нивните активности поврзани со 30-годишното музичко постоење на македонската сцена и кои, како што кажа Пеце, ќе ги има во голем број во периодот што е пред нас, сѐ до финалниот голем концерт закажан за 29 јуни во 'Расадник'. Ќе биде убаво заеднички да се прослават двата родендена - и тој на 'Суперхикс' и на Општина Кисела Вода. Но, со деталите ќе излеземе подоцна. Засега да уживаме во новиот албум кој од она што досега го слушнав, многу ми се допаѓа“, изјави градоначалникот Ѓорѓиевски на денешната промоција.