Силното невреме што ја погоди Словенија поплави повеќе од 500 згради само во Љубљана, пишува 25ur. Дежурните служби примиле повеќе од 2.700 повици од граѓани ноќеска меѓу 20 часот и полноќ.
Улиците се поплавени, како и подземните гаражи. Многу автомобили се уништени, а некои од луѓето заглавиле во поплавени автомобили.
Проблемот е во тоа што за многу кратко време наврнал силен дожд. Во Љубљана наврнало 88 литри на метар квадратен, нешто што се случува еднаш во 250 години, сметаат експертите.
Како што изјави метеорологот Рок Носан, на некои места за кратко време наврнало повеќе дожд отколку што врне вкупно во два месеца.
Во Љубљана поплавени се станови, училишта, градинки, магацини, подземни паркинзи. Од невремето и силниот ветер на улиците има и урнати дрвја.
Засега нема податоци за повредени лица.
