Околу 50 лица ги загубија животите во разорно торнадо кое го погоди Кентаки, пренесе CNN.
Бурата мина низ пет американски сојузни држави од петокот навечер и создаде најмалку 19 торнада кои причинија огромна штета. Има загинати и повредени и во другите сојузни држави.
Според гувернерот на Кентаки, Енди Бешир, најмалку 50 лица загинале во торнадото, но бројката може да биде многу поголема.
„Извештаите се навистина потресни“, изјави гувернерот за Washington Post.
Тој додаде дека надлежните служби за спасување не го потврдиле бројот на загинати или повредени до денеска, а бројките се од петокот.
Во Тенеси во бурата настрадале најмалку три лица, додека во северен Аркансас петмина се повредени кога покривот на старечки дом бил оштетен од торнадо. Во Илиноис властите објавија дека многу луѓе останале заробени откако покрив во магацин на Amazon делумно се урнал по торнадо и силно невреме.
