Фановите на „Симпсонови“ се убедени дека анимираната ТВ-серија уште еднаш предвиде два неповрзани актуелни настани што се случија ист ден - апсењето на Трамп и филмот за Барби.
Корисниците на социјалните мрежи уште еднаш на креаторите на серијата им препишаа видовите моќи, по обвиненијата кон поранешниот американски претседател Доналд Трамп и хистеријата околу филмот Barbie на Грета Гервиг.
Апсењето на претседателот и Barbie беа теми во заплетот во епизодата на „Симпсонови“ од 1994 година насловена „Lisa vs. Malibu Stacy“.
Обвинителот на Кривичниот суд на Менхетен го обвини Трамп по 34 точки од обвинението за фалсификување деловни книги. Ваквиот развој на настаните се совпадна со објавувањето на новиот трејлер за филмот Barbie со Марго Роби и Рајан Гослинг во главните улоги.
Сцена во епизодата прикажува ТВ програма каде водителот Кент Брокман ја споменува кампањата на Лиса Симпсон да ги натера креаторите на куклата Барби да воведат нејзина феминистичка верзија која ќе ги омоќи младите девојки.
„Иако беше невообичаено да се потрошат 28 минути известувајќи за кукла, невозможно е овој репортер да престане да зборува. Ова се навистина фасцинантни вести луѓе. Добра ноќ“, рече тој.
Потоа, во типичен пресврт, Брокман го завршува сегментот со објавување дека претседателот е уапсен.
Епизодата оригинално се емитуваше во 90-тите, кога популарноста на играчката беше на својот врв, и затоа не беше невообичаена референца во медиумите во тоа време. Можеби попрониклива беше премисата на епизодата за преобликување на имиџот на Барби за да ги одрази модерните феминистички вредности.
Овие предвидувања се придружуваат на долгата низа предвидувања на „Симпсонови“ кои наводно ќе се остварат. Во минатото, тие беа заслужни за „предвидување“ на сè, од немирите во Капитол до фактот дека Камала Харис стана потпретседателка.
Така, на социјалните мрежи се воодушевија од уште една „прецизна епизода“ во серијата и коментираа дека е „најлудата“ досега бидејќи поврзува два актуелни настани, како и дека сцената од епизодата „буквално ги прикажува денешните вести“.