Актуелниот англиски шампион најави дека за новата сезона посетителите на нивните домашни натпревари ќе имаат шанса за необично искуство пиејќи кафе или чај.
Во сабота од 16 часот „Граѓаните“ го играат првиот натпревар на домашен терен пречекувајќи го Норич на „Итихад“ стадионот. Токму на овој натпревар публиката ќе има шанса да ужива во новитетите на Манчестер Сити, кога станува збор за храна и пијалоци кои се продаваат на стадионот.
Меѓу многуте нови опции во делот за храна и пијалоци, Сити воведе и опција чија цел е намалување на ѓубрето - чашки кои се јадат. Сепак, навивачите кои ќе купат пијалок во таква чашка нема да бидат обврзани да ја изедат доколку не сакаат тоа да го направат.
„За прв пат на нашиот стадион се воведуваат чашки за кафе кои се јадат. Ова фантастично и иновативно решение ни нуди неверојатна шанса да се ослободиме од ѓубре, затоа изедете ја вашата чашка!“, стои во соопштението кое излезе на клупската веб-страница.
Нема сите топли пијалоци да се служат во вакви чашки. Навивачите ќе имаат опција да побараат нивното кафе или чај да го добијат во чашка која се јаде. Во спротивно, ќе добијат обична.
Клубот не понуди објаснување од што ќе бидат направени чашките кои навивачите ќе можат да ги јадат. Но, чашки кои се јадат веќе постојат ширум светот и тие најчесто се направени од вафли или бисквити, слично како корнети за сладолед.
Со употребата на вакви чашки Сити има за цел да го намали ѓубрето кое се трупа после секој натпревар. Клубот најави и дека ги укинува пластичните чаши во кои се точи пиво кое сега ќе биде послужувано во хартиени чаши, исто така почнувајќи од саботниот натпревар.
Покрај промената на чашите, Сити објави и дека е склучен договор со четири локални произведувачи на домашно пиво, како и со седум локални призводители на храна.