Деновиве беше објавена првата најава за новиот романтичен филм на AppleTV+ продукција, кој е сместен во 60-тите и раскажува за лансирањето на мисијата Apollo 11 за време на која луѓето прв пат слетаа на Месечината. Во главните улоги се Ченинг Тејтум и Скарлет Јохансон.
„Fly Me to the Moon“ е романтична комедија со Јохансон (Џохенсон) и Тејтум во главните улоги, сместена во 60-тите години која на големото платно го носи гламурот на вселенската трка, олд скул романсата и винтиџ модата од ерата.
Приказната започнува кога НАСА решава да ја ангажира Кели Џонс, остра и провокативна креативна директорка, за да го подобри нивниот јавен имиџ, но нејзиниот пристап го отежнува Кол Дејвис, резервираниот и суеверен директор задолжен за подготовка на мисијата Apollo 11. Откако мисијата сепак е успешно лансирана, во играта се вклучува и Белата куќа, која бара од заљубениот пар итно да лажира слетување на Месечината бидејќи не смеат да дозволат мисијата да пропадне по никоја цена...
Режисер на филмот е Грег Берланти (суперхеројските серии „Arrow“, „The Flash“, „Supergirl“, „Titans“, „Superman & Lois“, романтичната комедија „Life As We Know It“ и романтична драмедија „Love, Simon“).
Скарлет Јохансон, најпрофитабилната актерка ако се погледне вкупната кино заработка од филмовите во кои глумеше, е ценета по нејзината актерска широчина - мегапопуларната франшиза „Avengers“, оскаровската романтична драма „Marriage Story“, научно-фантастичниот спектакл „Lucy“, психолошкиот трилер „Prestige“ се само дел од насловите. Од друга страна, Ченинг Тејтум стана икона на комедиите по успехот на филмовите 21 и 22 „Jump Street“, но тој статус го задржа и со улогите во романтичната авантуристичка комедија „The Lost City“, шпионската акциона комедија „Kingsman“, а додаде и статус на секс симбол со улогата во филмскиот серијал „Magic Mike“.
Во филмот глуми и Вуди Харелсон („True Detectiv“, „Venom 2“, „Zombieland“, „The Hunger Games“, „Three Billboards Outside Ebbing“) како манипулативен владин човек кој ја носи Кели во НАСА и ја надгледува целата мисија. Тука е и Реј Романо („Everybody Loves Raymond“, оригинален глас на Мени во серијалот „Ice Age“, филмот „The Irishman“) кој глуми добронамерен и симпатичен советник на Кол Дејвис.