Фински скијач во слободен стил доживеа тежок пад на денешниот натпревар на Зимските олимписки игри во Пекинг, при што удри во камерман.
21-годишниот Јон Салинен за време на настапот го удри камерманот кој беше веднаш до патеката за да ги овековечи најдобрите моменти.
Салинен беше на половина од трката кога му се исфрли опремата од рака и падна на оградата. Но, тоа не го спречи да го продолжи натпреварувањето. Стана, тргна по патеката и изгледаше релативно добро. На интернет има и снимка од инцидентот, додека Eurosport јавува дека колега му помагал на камерманот и тој е добро, без повреди.
Салинен даде изјава по трката: „Не бев сигурен дали ќе настапам повторно по несреќата. Се надевам дека камерманот е добро, слетав токму на него“, рече тој, а за инцидентот го обвини облачното и снежно време.
Поради падот Салинен заврши последен од вкупно 23 натпреварувачи во квалификациите, но затоа стана вирален на интернет.
