На вчерашната седница на Советот на Општина Центар беа донесени неколку важни одлуки, информира граѓанската иницијатива Шанса за Центар.
Преку социјалните медиуми оттаму објавија дека на седницата биле разгледани извештаи за градинките во Центар кои јасно ја презентираа својата работа, капацитетите, запишаните деца, условите и услугите за згрижување.
„За сите родители, важна информација е дека во градинката 'Раде Јовчевски Корчагин' се организира и втора смена до 22 часот, во случај да ви е потребна“, информираат од Шанса за Центар.
„За проектот за грижа во домот кој нуди згрижување на стари и болни лица, а под раководство на УНДП, изгласавме доделување на стан кој е во сопственост на Општината. Веруваме дека грижата ќе помогне не само за болните лице, туку ќе отвори слободно време за домашните кои се постојано окупирани со негата.
Училишните одбори во општинските училишта се најважните претставници на заедницата во училиштето, но и на училиштето во заедницата, а одговорноста ја имаат пред основачот на училиштето (општината), образовните власти, но и пред заедницата и општеството во целина. За сите основни училишта во нашата општина понудивме високо образувани, посветени, вредни и докажани личности, кои во целост беа надгласани од коалицијата на СДСМ и Левица кои си ги поделија овие места меѓусебно“, велат оттаму и додаваат дека:
„Левица, во одбрана на кадровските решенија понудени од СДСМ, не бираше зборови за да ги оцрни нашите предлози, особено предлогот за ООУ Кирил и Методиј, Мерсиха Смаиловиќ. Недоличното оцрнување, говорот на омраза, навредите и лажните изјави упатени кон нашиот предлог се недозволено однесување кое во целост ја разобличува оваа партија. Институциите ќе имаат предмет со кој ќе се зафатат во следниот период, а Шанса за Центар нема да се поколеба да предлага луѓе од помалкубројните етнички заедници кои вистински се залагаат за мултикултурализам, солидарност и грижа за децата и образовниот процес.“
Од Шанса за Центар велат дека нема да ги коментираат избраните членови, но дека очекуваат да покажат сериозност во задачата поголема од сериозноста на Советниците „кои и сами не знаеја за кого го даваат својот глас и одлучуваат за Основните училишта“.
