Словенија се подготвува да ги укине последните рестриктивни мерки поврзани со намалената епидемија на COVID-19, потврди словенечкиот министер за здравство Јанез Поклукар.
Во последните денови е забележан силен тренд на опаѓање на бројот на инфекции и хоспитализации, па одлуката за укинување на задолжителното носење маски во затворен простор можно е да биде донесена неделава.
Наместо обврска, носењето маски во затворени простории ќе остане само како препорака, а маските сепак ќе треба да се носат во домовите за стари лица и болниците, рече Поклукар во соопштението за печатот, по посетата на Инфективната клиника во Љубљана, каде што разговараше за актуелната епидемиолошка и здравствената состојба.
Поклукар очекува дека претстојните летни месеци ќе бидат обележани со „враќање на старото нормално“.
Директорката на Инфективната клиника, Татјана Лејко Жупанц, рече дека состојбата во установата се подобрува, но бавно, и дека вирусот е најопасен за имунокомпромитирани пациенти на кои често им требале повеќекратни хоспитализации и „не можеле да се ослободат“ од вирусот.
Словенечката влада денеска соопшти дека во изминатите 24 часа се потврдени 528 нови инфекции со околу 3.800 PCR и брзи антигенски тестови, што е голем пад од претходниот ден кога имаше 785 и од пред седум дена кога имаше 802 инфекции.
Во болниците моментално има 275 пациенти со ковид, од кои 39 се на одделенија за интензивна нега, а 14-дневната инциденца и 7-дневниот просек на заболените во еден ден се намалува. Во последните 24 часа починале тројца пациенти, соопшти словенечкото Министерство за здравство.
