Норвешките власти најавија дека ќе го евакуираат подрачјето на северот на земјата каде од лавини и одрони загинаа четири лица, меѓу кои и туристи од Словенија и Италија.
Норвешката полиција извести дека одлуката е заснована на препорака на Норвешкиот геотехнички институт и дека се однесува на неколку делови од арктичкиот град Тромсе.
Четири лица загинаа, а едно лице е тешко повредено во три одвоени лавини во областа во петокот.
Норвешката новинска агенција NTB објави дека група скијачи туристи од Словенија била фатена среде лавина, а еден од членовите - маж на 40-годишна возраст загинал. Загинале и италијанска скијачка на 30-годишна возраст и Норвежанка на 60-годишна возраст, соопшти агенцијата.
Полицијата соопшти дека лавината во морето однела куќи и плевни, а неколку патишта се отсечени од остатокот од земјата.
Неколку лавини и одрони се регистрирани вчера во областа Тромсе. Полицијата ги советуваше жителите и посетителите да останат во затворен простор.
Црвениот крст соопшти дека ја следи ситуацијата и дека е подготвен да обезбеди храна и лекови со моторни санки и теренски возила во случај жителите на малите села во областа да бидат отсечени.