Украина користи софтвер за препознавање лица за да ги идентификува телата на руските војници убиени во борбите. Целта на украинските власти е да ги пронајдат нивните семејства за да ги информираат за нивната смрт, изјави украинскиот вицепремиер.
Украинското Министерство за одбрана овој месец почна да ја користи технологијата Clearview AI, провајдер за препознавање лица со седиште во Њујорк, кој наоѓа слики на интернет што одговараат на лицата на објавените фотографии. Во тоа време не беше јасно како ќе се користи технологијата.
Михаил Федоров, заменик-премиер на Украина, кој исто така го предводи Министерството за дигитална трансформација, рече дека Украина го користи софтверот за вештачка интелигенција Clearview за да ги најде профилите на социјалните мрежи на загинатите руски војници.
Тој рече дека властите потоа испраќаат пораки до роднините за да се договорат за преземање на телото. Колку руски војници се досега загинати при специјалната воена операција во Украина, сѐ уште не се знае и тешко е да се процени бидејќи Русија од 2 март нема објавено бројки, а тогаш пријави 498 загинати.
„Од љубезност кон мајките на овие војници, ние ја шириме оваа информација на социјалните мрежи за барем семејствата да знаат дека ги изгубиле своите деца и потоа да им дозволат да дојдат и да ги земат нивните тела“, вели Федоров во соопштението.
Противниците на препознавањето на лицата, вклучително и групите за граѓански права, го критикуваа усвојувањето на Clearview од страна на Украина, наведувајќи ја можноста за погрешна идентификација.
Федоров истакна дека Украина не користи технологија за да ги идентификува своите загинати војници, без да прецизира зошто.
Clearview, кој по руската инвазија бесплатно ѝ ја понуди својата услуга на Украина, рече дека неговиот пребарувач вклучува повеќе од 2 милијарди слики од ВКонтакте, популарната руска социјална мрежа.
