Во Франција досега се собрани над милион евра во кампањата за помош организирана за поддршка на полицаецот што го уби 17-годишниот Нахел со алжирско потекло.
Собирот на средства го почна екстремниот десничар Жан Месја на платформата GoFundMe и досега се собрани 1.048.350 евра.
Жан Месја, кој е близок до екстремно десничарскиот Ерик Земур, изјави дека кампањата за донации бргу се зголемила на лимитот од 1 милион евра и рече: „Ќе покажеме колку ја сакаме нашата полиција“.
Баба му на починатиот Нахел, Надја, рече дека собирањето средства ѝ го скршило срцето. Говорејќи за BFMTV, Надја рече дека „има доверба во правосудниот систем, а полицаецот ќе биде казнет како и сите други“.
Според Жан Месја, полицаецот обвинет за присилно убиство, ја извршил својата должност и сега плаќа за тоа.
„Макрон го презеде случајот на Нахел. Ние го презедовме случајот на полицијата и жандармеријата“, рече политичарот во изјава за CNews.
Оние што реагираа на поведувањето на кампањата за донации на социјалните мрежи апелираат кампањата да се повлече.
Според француските медиуми, кампањата за собирање средства за поддршка на жолтите елеци обвинети за насилство во 2019 била цензурирана од владата.
Инаку, и самиот Месја е со имигрантско потекло, како и убиениот тинејџер Нахел. Месја е и роден во Египет, како Хосан Бутрос Месиха, етнички Копт, а кога имал 8 години со родителите се преселил во Франција, каде потоа и си го променил името во Жан Месја.