Авантурите на омилениот лик од видео игриците ќе можеме да ги гледаме во анимираната серија на платформата Netflix.
„Sonic Prime“, новата анимирана серија со популарниот син еж во главната улога, премиерно ќе биде прикажана на Netflix на 15 декември годинава. Стриминг платформата објави некои нови детали од заплетот кои укажуваат на тоа дека Соник ќе мора да тргне во мултиверзумска авантура.
„Авантурите на ежот Соник, преполни со акција, влегуваат во петта брзина кога средбата со д-р Егман ќе доведе до настан кој буквално го разбива универзумот. Очајнички посакувајќи повторно да ја состави својата оригинална реалност и да ги спаси своите стари пријатели, Соник ита низ разбиениот универзум отркривајќи чудни светови и собирајќи нови пријатели во епската авантура“, пишува во синопсисот.
Датумот за премиерата Netflix го најави на новите постери на кои имаме прилика, освен познатите ликови, да видиме и добро познати ликови од видео игриците со синиот еж.
„Sonic Prime“ анимираната серија ни пристигнува само месец дена по лансирањето на „Sonic Frontiers“, новата игрица на компанијaта Sega која, по она што можевме да го видиме, неодоливо нѐ потсетува на „Breath of the Wild“.
Дополнително, кога ќе ја одиграат игрицата и кога ќе ја изгледаат првата сезона од новата серија, фановите на серијалот ќе можат да ѝ се радуваат и на серијата со Идрис Елба во улогата на Никлс, која во 2023 година ќе биде прикажана на Paramount Plus стриминг сервисот, а се очекува и филмот за синиот еж да добие трет дел до крајот на 2024 година.
