Компанијата Sony го претстави професионалниот дрон Airpeak S1 кој беше најавен во јануари.
Официјалната презентација донесе повеќе детали за дронот, како и неговата цена, која гласи 9.000 американски долари.
Airpeak S1 е дизајниран да користи Sony камери A7S Mark III, FX3 и Alpha 1 кои поддржуваат 8K резолуција. Камерите ќе бидат фиксирани на специјалната верзија на Gremsy T3 гимбал дизајниран специјално за Airpeak и ќе се купуваат одделно. Со камерата, дронот ќе може да лета околу 12 минути, но без никаков товар може да помине 22 минути во воздух. Исто така, треба да се напомене дека на фотоапаратот му е потребна сопствена батерија која не доаѓа заедно со дронот.
Sony веќе демонстрираше какви снимки може да направи дронот.
Еден од најголемите адути на дронот е неговата стабилност и отпорност на ветер. Може да остане стабилен дури и при ветрови што дуваат со брзина од околу 20 m/s, а поседува и пет комплети стерео камери и инфрацрвен сензор кои му помагаат да избегне пречки и да остане стабилен дури и без сателитски прием. Во тестирањето на дронот помогна и јапонската вселенска агенција ЈАКСА.
Airpeak е исто така брз, забрзува од 0 до 80 km/h за 3,5 секунди, а неговата максимална брзина е 90 km/h. Треба да се напомене дека овие перформанси се постигнуваат без дополнителен товар.
Со дронот може да се управува со далечински управувач, а апликацијата Sony Airpeak Flight ги прави работите уште полесни. Во моментов е компатибилен само со iOS и iPadOS и овозможува контрола на камерата и гимбалот. Само едно лице може да го контролира, но исто така е овозможен режим со дуал-оператор во кој едно лице го контролира летот, а другото камерата. Опсегот на управување сѐ уште се тестира.
Дронот чини 9.000 долари без гимбалот и камерата, а доаѓа со два пара пропелера, волан, две батерии и полнач. Испораките се очекуваат наесен, а ќе биде понуден и план за сервисирање кој би покривал евентуални штети поради падови.
Sony го дизајнираше и произведе својот нов дрон во Јапонија.
