Некој би рекол дека вотката, па и вискито, веројатно се најпопуларните жестоки пијалаци, меѓутоа, тоа е всушност еден сосема друг пијалак за кој многумина воопшто и не слушнале.
Станува збор за соџу (소주), традиционален жесток пијалак со кој се насладуваат жителите на Јужна Кореја. Во буквален превод значи „прегорен ликер“.
Соџуто Jinro се најде на меѓународната официјална листа на најпродавани алкохолни пијалаци ширум светот, со оглед на тоа што во текот на оваа 2022 година биле испорачани 65 милиони деветтолитарски пакувања од овој алкохол во сите делови на светот. Тоа е трипати повеќе од популарната вотка Smirnov.
Овој пијалак се продава во 80 земји, а за тоа придонес има и популарната јужнокорејска суперѕвезда PSY, кој не само што го прогласи соџуто за свој најдобар пријател, туку и му ги „позајми“ своите препознатливи очила за повеќе кампањи на производителот Chamisul.
Освен тоа, Јужна Кореја е земја во која се пие најмногу алкохол по глава на жител, а речиси 97% од пазарот со жестоки пијалаци го сочинува соџуто.
Соџу е дел од корејската култура уште од XIV век кога монголските освојувачи го запознале локалното население со процесот на дестилација. Денешните сорти соџу имаат околу 45% алкохол.
Се прави од ориз, а одлично оди со традиционалната корејска храна како што се теокпоки (ориз и рибни колачи) или солени школки. Често се пие и со јокбал - свински нозе готвени и зачинети во интересна супа, како и со босами - свинско месо готвено на пареа, замотано во лист од црвена зелка со лук, пиперчиња и кимчи (корејска кисела зелка).
Доколку не сте љубител на жестоко, можеби поинтересна ќе ви биде комбинацијата пиво со соџу. Постојат различни пропорции, а најпопуларна е 30% соџу со 70% пиво.